Magni Sær Gunnarsson sigurvegari Stóru upplestrarkeppninnar í Reykjanesbæ

Lokahátíð Stóru upplestrarkeppninnar í Reykjanesbæ fór fram í Stapa í 28. sinn miðvikudaginn 12. mars. Það eru nemendur í 7. bekk úr grunnskólum Reykjanesbæjar sem taka þátt í keppninni ár hvert. Áður höfðu skólarnir haldið forkeppni og valið tvo fulltrúa hver. Fjórtán keppendur tóku því þátt að þessu sinni, tveir frá hverjum skóla. Stóra upplestrarkeppnin hefst formlega á degi íslenskrar tungu þann 16. nóvember ár hvert en það er fæðingardagur Jónasar Hallgrímssonar. Fram að lokakeppni leggja nemendur og kennarar sérstaka áherslu á vandaðan upplestur og framsögn. 

Dómnefndin var ekki öfundsverð af hlutskipti sínu að velja í verðlaunasæti enda lagði Guðbjörg Sveinsdóttir formaður dómnefndar áherslu á það að allir væru í raun og veru sigurvegarar þar sem hver og einn keppandi hefði sigrað í sínum skóla. Að sama skapi hvatti hún keppendur til þess að halda áfram að leggja rækt við þennan þátt móðurmálsins, vandaðan upplestur og framburð. Helgi Arnarson sviðsstjóri menntasviðs Reykjanesbæjar tók í sama streng og lagði áherslu á að hvert og eitt þeirra væri sigurvegari í þeim skilningi að keppendur hefðu tekið miklum framförum frá því þeir hófu þessa vegferð í nóvember. Hann sagði jafnframt að það væri í raun alveg stór merkilegt að á hverju ári skuli heill árgangur í nær öllum, ef ekki öllum, grunnskólum landsins verja stórum hluta vetrarins í að æfa sig í flutningi íslensks máls. Helgi þakkaði Önnu Huldu Einarsdóttur kennsluráðgjafa á skrifstofu menntasviðs og Haraldi Axel Einarssyni grunnskólafulltrúa fyrir að hafa umsjón með Stóru upplestrarkeppninni og hafa veg og vanda að undirbúningi þessarar glæsilegu hátíðar. 

Sigurvegarar keppninnar í ár voru eftirfarandi: 

1. sæti: Magni Sær Gunnarsson, Háaleitisskóli.

2. sæti: Kristjana Nótt Guðrúnardóttir, Myllubakkaskóli. 

3. sæti: Jan Ólafur W. Halldórsson, Myllubakkaskóli.

Allir keppendurnir fengu bók og rós í viðurkenningarskyni en fyrstu þrjú sætin fengu einnig peningaverðlaun frá Íslandsbanka.

Ómissandi þáttur þessarar hátíðlegu stundar er tónlistarflutningur nemenda Tónlistarskóla Reykjanesbæjar en flutt voru þrjú tónlistaratriði á hátíðinni. Í upphafi léku þeir Davíð Þór Garðarsson og Jan Ólafur W. Halldórsson á saxófón When the Saints við undirleik Alberts Sölva Óskarssonar. Eftir hlé lék Vanessa Godlewska Swanlake e. PyotrTchaikovsky á fiðlu en Sigrún Gróa Magnúsdóttir lék undir á píanó. Þegar dómnefnd vék úr salnum fengu gestir að njóta píanóleiks en það voru þeir Sveinn Rúnar Sveinbjörnsson sem lék StefúrCarmen e. George Bizet og Óliver Ágúst C. Magnússon lék Ballede e. Friedrich Burgmuller

Rósa Kristín Jónsdóttir sigurvegari í Stóru upplestrarkeppninni frá fyrra ári kynnti skáld hátíðarinnar, Hjalta Halldórsson. Jón Ingi Garðarsson einnig sigurvegari frá því í fyrra, kynnti ljóðskáld hátíðarinnar sem voru mörg að þessu sinni.  Þá las JakubPiotrMaliszewskinemandi í Heiðarskóla ljóð á móðurmáli sínu, pólsku. Að lokum flutti Helgi Arnarson sviðsstjóri menntasviðsávarp og afhenti bókagjafir. 

Ástæða er til að þakka öllum upplesurum, tónlistarflytjendum, kennurum og foreldrum fyrir frábæran undirbúning sem skilaði sér í vönduðum og góðum flutningi fyrir fullum sal af áhorfendum, segir í frétt frá Reykjanesbæ.

Keppendur sem tóku þátt: 

Árdís Eva Árnadóttir, Heiðarskóli

Bergur Freyr Jónsson, Akurskóli

Elena Lilja Söring Arnarsdóttir, Háaleitisskóli

Eva Sól Lucic, Akurskóli

Jan Ólafur W. Halldórsson, Myllubakkaskóli

Karen Gígja Guðnadóttir, Njarðvíkurskóli

Karen Júlía Traustadóttir, Stapaskóli

Katla Diljá Sigurðardóttir, Stapaskóli

Kristjana Nótt Guðrúnardóttir, Myllubakkaskóli

Magni Sær Gunnarsson, Háaleitisskóli

Sóley Rún Arnarsdóttir, Holtaskóli